ଗ୍ବାଲିୟର ୧୪।୧୧: ମଧ୍ୟପ୍ରଦେଶ ଗ୍ବାଲିୟରରେ ଥଣ୍ଡାରେ ଥରୁଥିବା ଜଣେ ଭିକାରୀଙ୍କୁ ସାହାଯ୍ୟ କରିବା ପାଇଁ ଡିଏସପି ନିଜ ଗାଡି ରୋକିବା ପରେ ଆଶ୍ଚର୍ଯ୍ୟ ହୋଇଯାଇଥିଲେ । କାରଣ ସେହି ଭିକାରୀ ଜଣଙ୍କ ତାଙ୍କ ବ୍ୟାଚ୍ ର ସହଯୋଗୀ ପୋଲିସ ଅଫିସର ଥିଲେ । ତାଙ୍କୁ ଦେଖିବା ପରେ ଡିଏସପି ଜଣଙ୍କ ତାଙ୍କ ଜୋତା ଏବଂ ଜ୍ୟାକେଟ୍ ଦେଇଦେଇଥିଲେ । କେବଳ ଏତିକି ନୁହେଁ ସେ ତାଙ୍କୁ ତାଙ୍କ ସହ ନେଇଯାଇଥିଲେ । ତାଙ୍କ ଚିକିତ୍ସା ମଧ୍ୟ ଆରମ୍ଭ କରିଦେଲେ ।
ସୂଚନା ଅନୁସାରେ ଗ୍ବାଲିୟରରେ ଉପନିର୍ବାଚନ ଭୋଟ୍ ଗଣତି ପରେ ଡିଏସପି ରତ୍ନେଶ ସିଂହ ତୋମାର ଏବୂ ବିଜୟ ସିଂହ ଭଦୌରିଆ ରାଉଣ୍ଡରେ ବାହାରିଥିଲେ । ଏହି ସମୟରେ ଝାନସୀ ରୋଡ୍ ରେ ଭାଟିକା ଫୁଟପାଥ ରାସ୍ତାରେ ତାଙ୍କୁ ଜଣେ ଭିକାରୀ ଶୀତରେ ଥର ଥର ହେଉଥିବା ଦେଖିବାକୁ ମିଳିଥିଲା । ଏହାପରେ ଦୁଇ ଅଧିକାରୀ ଗାଡିଟିକୁ ଅଟକାଇଥିଲେ । ସେହି ଭିକାରୀଙ୍କ ସହ କଥା ହେବାକୁ ତାଙ୍କ ନିକଟରେ ପହଞ୍ଚିଥିଲେ ।
କଥାବାର୍ତ୍ତା ସମୟରେ ଡିଏସପି ବିଜୟ ଭଦୌରିଆ ନିଜ ଜ୍ୟାକେଟ୍ ତାଙ୍କୁ ଦେଇଦେଇଥିଲେ । ସେହି ସମୟରେ ଦୁଇ ଅଧିକାରୀଙ୍କୁ ଜଣାପଡିଥିଲା ଯେ, ସେହି ଭିକାରୀ ଜଣଙ୍କ ତାଙ୍କ ବ୍ୟାଚର ଜଣେ ଅଧିକାରୀ ମନୀଷ ମିଶ୍ରା । ମନୀଷ ମିଶ୍ରା ଗତ ୧୦ ବର୍ଷ ମଧ୍ୟରେ ଅସହାୟ ଭାବେ ରାଜରାସ୍ତାରେ ବୁଲୁଥିଲେ । ମନୀଷ ୧୯୯୯ରେ ପୋଲିସ ଚାକିରୀରେ ଯୋଗଦେଇଥିଲେ । ଏହାପରେ ମଧ୍ୟପ୍ରଦେଶର ଅନେକ ସ୍ଥାନରେ ଥାନା ଅଧିକାରୀ ଭାବେ କାମ କରିଥିଲେ । ୨୦୦୫ରେ ସେ ଦତିୟାରେ ଶେଷ ଥର ପାଇଁ ଥାନା ପ୍ରଭାରୀ ଭାବେ ନିଯୁକ୍ତି ପାଇଥିଲେ । ଏହାପରେ ସେ ତାଙ୍କ ମାନସିକ ସନ୍ତୁଳନ ହରାଇ ବସିଥିଲେ । ପରିବାର ଲୋକ ତାଙ୍କ ଚିକିତ୍ସା ଆରମ୍ଭ କରିଥିଲେ । ସେହି ସମୟରେ ତାଙ୍କ ପତ୍ନୀ ତାଙ୍କୁ ଛାଡି ପଳାଇଥିଲେ ।
