କେନ୍ଦ୍ରାପଡା ୨।୪: ଶୁକ୍ରବାର ତୁଳସୀ କ୍ଷେତ୍ରରେ ହୋଲି ଉତ୍ସବ । ଏଥିପାଇଁ କଟକଣା ଜାରି କରିଛି ଜିଲ୍ଲା ପ୍ରଶାସନ । ସକାଳ ୬ଟା ରୁ ଅପରାହ୍ନ ୩ଟା ପର୍ଯ୍ୟନ୍ତ କେନ୍ଦ୍ରାପଡ଼ା ପୌରାଞ୍ଚଳ ଅଧୀନରେ ଥିବା ସମସ୍ତ ଦୋକାନ ବଜାର ବନ୍ଦ ରଖିବା ପାଇଁ ପ୍ରଶାସନ ପକ୍ଷରୁ ନିର୍ଦ୍ଦେଶାନାମା ଜାରି କରାଯାଇଛି । ସେହିପରି କୌଣସି ସର୍ବସାଧାରଣ ସ୍ଥାନରେ ହୋଲି ଉତ୍ସବ ପାଳନ ଅଥବା ରଙ୍ଗ ଖେଳିବାକୁ ମଧ୍ୟ ବାରଣ କରାଯାଇଛି ।
ଶୁକ୍ରବାର ପାଳିତ ହେଉଥିବା ପଞ୍ଚୁ ଦୋଳ ଏବଂ ଛାମୁ ମେଳଣରେ ଧାର୍ଯ୍ୟ ସଂଖାରୁ ଅଧିକ ଭକ୍ତଙ୍କ ସମାଗମ ହୋଇ ପାରିବେନି ବୋଲି ନିର୍ଦ୍ଦେଶ ରହିଛି । ଏ ନେଇ କେନ୍ଦ୍ରାପଡା ପୌର ସଂସ୍ଥା ପକ୍ଷରୁ ମାଇକ ଯୋଗେ ପ୍ରଚାର କରାଯାଇ ସାଧାରଣ ଲୋକଙ୍କୁ ସଚେତନ କରାଯାଇଛି । ସହରରେ ଶାନ୍ତି ଶୃଙ୍ଖଳା ବଜାୟ ରଖିବା ପାଇଁ ବ୍ୟାପକ ପୋଲିସ ବ୍ୟବସ୍ଥା କରାଯାଇଛି । ତେବେ ନିର୍ଦ୍ଦେଶ ଉଲଂଘନକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉପ ଜିଲ୍ଲାପାଳ ନିରଞ୍ଜନ ବେହେରା ସୂଚନା ଦେଇଛନ୍ତି ।
