ଭୁବନେଶ୍ବର ୨୨।୨: ମଙ୍ଗଳବାର ହେଉଛି ୨୨୦୨୨୦୨୨ । ଅର୍ଥାତ ୨୦୨୨ ମସିହା, ଫେବ୍ରୁଆରୀ ୨୨ ତାରିଖ । ଏହି ତାରିଖ ଜୀବନକାଳ ମଧ୍ୟରେ ଥରେ ଆସେ । ଏହି ତାରିଖରେ ସମୁଦାୟ ୬ଟା ଦୁଇ ରହିଛି । ୬ଟା ୨କୁ ପରସ୍ପର ସହିତ ଗୁଣିଲେ ୧୨ ହେଉଛି । ଜ୍ୟୋତିଷଶାସ୍ତ୍ର ଅନୁସାରେ ଏହି ଦିନକୁ ଅମୃତବେଳା କୁହାଯାଉଛି । ଜ୍ୟୋତିଷ ବିଶାରଦ ପ୍ରମୋଦ ପାତ୍ର କହିଥିଲେ, ଆଜି ଦିନର ସଂଖ୍ୟା ହେଉଛି ଶୁଭ ନମ୍ବର । ତା’ସହିତ ଏହି ତାରିଖ ଶୁଣିବାକୁ ଭଲ ଲାଗୁଛି ।
ସଂଖ୍ୟା ତତ୍ତ୍ବ ଓ ଧନକାରକ ହିସାବରେ ବହୁ ବ୍ୟକ୍ତିଙ୍କୁ ଏହା ଶୁଭଫଳ ଦେବ । ଦୁଇ ନମ୍ବର ମେଷ, ମିଥୁନ, ସିଂହ, ତୁଳା, ମକର, କୁମ୍ଭ, ମୀନ ରାଶି ଲାଗି ଆଜିର ଦିନଟି ଅତ୍ୟନ୍ତ ଶୁଭପ୍ରଦ । ଆର୍ଥିକ, ବୃତ୍ତିଗତ, ପାରିବାରିକ, ସ୍ବାସ୍ଥ୍ୟଗତ, ସାମାଜିକ, ଭୌତିକ, ମାଙ୍ଗଳିକ, ରାଜନୈତିକ ପ୍ରତି କ୍ଷେତ୍ରରେ ଏହି ରାଶିର ବ୍ୟକ୍ତିବିଶେଷ ଲାଗି ଆଶାନୁରୁପ ଶୁଭଫଳ ଭୋଗ କରିବେ । ହେଲେ ଦୁର୍ଭାଗ୍ୟବଶତଃ କନ୍ୟା, ବିଛା ଓ ଧନୁରାଶି ଲାଗି ଅର୍ଥ ଅନର୍ଥ, ଆଶା ଆଶଙ୍କାରେ ପରିଣତ ହେବ । ସମସ୍ତ ପ୍ରକାରର ଯୋଗ୍ୟତା, ସଫଳତା ଥିଲେ ମଧ୍ୟ ଶେଷ ମୁହୂର୍ତ୍ତରେ ହାତଛଡ଼ା ହେବ ଶୁଭଫଳ ।
ସେପଟେ ଏହି ସଂଖ୍ୟା ବିଜ୍ଞାନରେ ଏହାକୁ ‘ପରିସଂଖ୍ୟା’ ଭାବେ ବିବେଚନା କରାଯାଏ ବା ଏଭଳି ଏକ ସଂଖ୍ୟା ଯାହା ନିର୍ଦ୍ଦିଷ୍ଟ ଉର୍ଜ୍ଜା କିମ୍ବା ବିଶ୍ବସ୍ତରୀୟ ବାର୍ତ୍ତା ବହନ କରେ । ସେହି ଦୃଷ୍ଟିରୁ ଆଜିର ତାରିଖର ଅର୍ଥ ‘ସଂଯୋଗ ଓ ଏକତ୍ର ଆସିବା’ । ଏହାର ଅର୍ଥ କେବଳ ଗୋଟିଏ ପରେ ଗୋଟିଏ ସଂଖ୍ୟା ଯୋଡ଼ି ହୋଇ ଆସିବା ନୁହେଁ, ବରଂ ବିଶାଳ ସମୂହ ଓ ସମୁଦାୟର ସଂଯୋଗ । ଅଙ୍କଶାସ୍ତ୍ରୀ ଜାସ୍ମିନ ଓଲ୍ଫ କହନ୍ତି, ‘୨’ ହେଉଛି ଅନ୍ତଜ୍ଞା, ଅବଲୋକନ ଓ ସମ୍ପର୍କର ସଂଖ୍ୟା । ବ୍ରହ୍ମାଣ୍ଡ ଏହି ଆକର୍ଷଣକୁ ଦୁଇଗୁଣ କରୁଛି ବୋଲି ଆପଣ କହିପାରିବେ । କାରଣ ଗୋଟିଏ ତାରିଖରେ ୬ଟି ‘୨’ର ଉପସ୍ଥିତି ସହଯୋଗ ଓ ମିଳିତ କାର୍ଯ୍ୟ ନିମନ୍ତେ ଆମ ମାନବୀୟ ଆବଶ୍ୟକତାର ପ୍ରତିଫଳନ ବୋଲି ଅଙ୍କଶାସ୍ତ୍ରୀ ଜୋହାନା ଅଗଷ୍ଟା କହିଛନ୍ତି । ତାଙ୍କ କହିବା ଅନୁସାରେ, ନିଜ ପ୍ରିୟଜନଙ୍କ ସହିତ ଆମେ କିପରି ଯୋଗାଯୋଗ କରୁ, ଏହି ଦିବସ ତା’ର ପ୍ରତିଫଳନ । ହୃଦୟ ଖୋଲା ସମ୍ପର୍କ ବଜାୟ ରଖିବାକୁ ଏହି ଦିବସ ବାର୍ତ୍ତା ଦିଏ ।
