ନୂଆଦିଲ୍ଲୀ : ଟିକା ନେବାପାଇଁ ଏବେ କୌଣସି ନିର୍ଦ୍ଦିଷ୍ଟ ସମୟସୀମା ରହିବ ନାହିଁ। କେନ୍ଦ୍ର ସରକାର ଏ ବାବଦ କଟକଣା ଆଜି ହଟାଇ ଦେଇଛନ୍ତି। ଯେକୌଣସି ଦିନ ଯେ କୌଣସି ସମୟରେ ଲୋକମାନେ ନିଜ ସୁବିଧାରେ ଟିକା ନେଇପାରିବେ ବୋଲି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡ. ହର୍ଷବର୍ଦ୍ଧନ କହିଛନ୍ତି। ଦେଶବ୍ୟାପୀ ଟିକାକରଣ କାର୍ଯ୍ୟକ୍ରମକୁ ତ୍ବରାନ୍ବିତ କରିବା ପାଇଁ ସରକାର ଏହି ନିଷ୍ପତ୍ତି ନେଇଛନ୍ତି। ଲୋକମାନେ ୨୪ ଘଣ୍ଟା ଏବଂ ସପ୍ତାହରେ ୭ ଦିନ ମଧ୍ୟରୁ ଯେ କୌଣସି ସମୟରେ ସେମାନଙ୍କ ସୁବିଧା ଅନୁଯାୟୀ ଟିକା ନେଇପାରିବେ ସେ କହିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲୋକଙ୍କ ସମୟ ଏବଂ ସ୍ବାସ୍ଥ୍ୟକୁ ଗୁରୁତ୍ବ ଦେଇ ଏଭଳି ପଦକ୍ଷେପକୁ ପ୍ରୋତ୍ସାହିତ କରିଛନ୍ତି ବୋଲି ମନ୍ତ୍ରୀ କହିଛନ୍ତି।
ପୂର୍ବରୁ ସକାଳ ୯ରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଟିକାକରଣ ପାଇଁ ବ୍ୟବସ୍ଥା ଥିଲା। ଏବେ ହସ୍ପିଟାଲ୍ମାନେ ଯେତେ ସମୟ ପର୍ଯ୍ୟନ୍ତ ଚାହିବେ ଟିକାକରଣ କାର୍ଯ୍ୟ ଜାରି ରଖିବେ। ଦେଶରେ ଦ୍ବିତୀୟ ପର୍ଯ୍ୟାୟ ଟିକାକରଣ ଆରମ୍ଭ ହେବାର ୨ଦିନ ମଧ୍ୟରେ ୫.୯୪ ଲକ୍ଷ ଲୋକ ଟିକା ନେଇଛନ୍ତି। ୬୦ ବର୍ଷରୁ ଊର୍ଦ୍ଧ୍ବ ୫.୨୨ ଲକ୍ଷ ଏବଂ ୪୫ରୁ ୬୦ ବର୍ଷ ମଧ୍ୟରେ ୭୧,୮୯୬ ଜଣ ଟିକା ନେଇଛନ୍ତି। ଏଯାବତ୍ ବିଭିନ୍ନ ଟିକାକରଣ କେନ୍ଦ୍ରରେ ୧.୫୬ କୋଟି ଲୋକ କରୋନା ଟିକା ନେଇଛନ୍ତି ବୋଲି ସରକାରୀ ତଥ୍ୟରୁ ଜଣାପଡ଼ିଛି।
