ନୂଆଦିଲ୍ଲୀ: ଚଳିତମାସରେ ଭାରତୀୟଙ୍କର ସୁଖ ସ୍ତରରେ ହ୍ରାସ ଘଟିଥିବା ‘ଇପସୋସ ଇଣ୍ଡିଆବସ୍ ହାପିନେସ୍ ମନିଟର’ ପକ୍ଷରୁ କୁହାଯାଇଛି। ଦୁଃଖୀ ସହରୀ ଭାରତୀୟଙ୍କ ଯୋଗୁ ଏହା ଘଟିଛି ବୋଲି ଅନୁଧ୍ୟାନକାରୀ ସଂସ୍ଥା ପକ୍ଷରୁ କୁହାଯାଇଛି। ଗତ ମେ ମାସରେ ମଧ୍ୟ ଭାରତୀୟଙ୍କ ସୁଖର ସ୍ତରରେ ହ୍ରାସ ଘଟିଥିଲା। ଏହି ମାସିକ ସର୍ବଭାରତୀୟ ସର୍ଭେରେ ୧୬ଟି ଭାରତୀୟ ସହରର ୨,୨୦୦ ଲୋକ ସେମାନଙ୍କ ପ୍ରତିକ୍ରିୟା ରଖିଥିଲେ। ଏଥିରେ ୧୬୦୦ ଜଣ ମୌଖିକ ଉତ୍ତର ଦେଇଥିଲା ବେଳେ ୪୦୦ ଜଣ ଅନଲାଇନ ଉତ୍ତର ଦେଇଥିଲେ।
ପରିବାର, ସ୍ବାସ୍ଥ୍ୟ, ବନ୍ଧୁ ଓ ନିଯୁକ୍ତି ଆଦି ବିଷୟ ଉପରେ ଅଂଶଗ୍ରହଣକାରୀଙ୍କ ମତାମତକୁ ଭିତ୍ତି କରି ଏହି ରିପୋର୍ଟ ପ୍ରସ୍ତୁତ ହୋଇଥିଲା। ସୁଖର ଉତ୍ସଭାବେ ୭୩ ପ୍ରତିଶତ ସହରୀ ଭାରତୀୟ ପରିବାରକୁ ବାଛିଥିବା ବେଳେ ୬୬ ପ୍ରତିଶତ ସ୍ବାସ୍ଥ୍ୟ, ୬୩ ପ୍ରତିଶତ ବନ୍ଧୁ ମହଲ, ୫୯ ପ୍ରତିଶତ ନିଯୁକ୍ତି ବା ଚାକିରି, ୫୮ ପ୍ରତିଶତ ସହକର୍ମୀ ବା ବ୍ୟବସାୟିକ ସହଯୋଗୀ, ୫୬ ପ୍ରତିଶତ ପଡ଼ୋଶୀ ଏବଂ ୫୨ ପ୍ରତିଶତ ଆର୍ଥିକ ଅବସ୍ଥାକୁ ବାଛିଥିଲେ।
