ଶ୍ରୀହରିକୋଟା: ଭାରତୀୟ ମହାକାଶ ଗବେଷଣା କେନ୍ଦ୍ର (ଇସ୍ରୋ) ମଙ୍ଗଳବାର କହିଛି ଯେ ଚନ୍ଦ୍ରଯାନ-୩ ମିସନ ପାଇଁ ସମଗ୍ର ଉତ୍କ୍ଷେପଣ ପ୍ରସ୍ତୁତି ଏବଂ ପ୍ରକ୍ରିୟାକୁ ଅନୁସରଣ କରି ଏହା ଏକ ୨୪ ଘଣ୍ଟିଆ ‘ଲଞ୍ଚ୍ ରିହର୍ସାଲ’ କରିଛି। ଚନ୍ଦ୍ରଯାନ-୩ ଜୁଲାଇ ୧୪ ଅପରାହ୍ଣ ୨ଟା ୩୫ରେ ଶ୍ରୀହରିକୋଟାସ୍ଥିତ ସତୀଶ ଧାବନ ମହାକାଶ କେନ୍ଦ୍ରରୁ ଏକ ଲଞ୍ଚ୍ ଭେଇକିଲ ମାର୍କ ୩ (ଏଲ୍ଭିଏମ୍୩) ଦ୍ବାରା ଉତ୍କ୍ଷେପିତ ହେବାର ଯୋଜନା ରହିଛି। ୨୪ ଘଣ୍ଟା ଧରି ଚାଲିଥିବା ‘ଲଞ୍ଚ ରିହର୍ସାଲ୍’ ଶେଷ ହୋଇଛି ବୋଲି ଇସ୍ରୋ ମଙ୍ଗଳବାର ଟ୍ୱିଟ୍ କରିଛି।
ଭାରତର ତୃତୀୟ ଚନ୍ଦ୍ର ଅନୁସନ୍ଧାନ ମିସନ ଚନ୍ଦ୍ରଯାନ-୩ ଏଲ୍ଭିଏମ୍୩ ଲଞ୍ଚରର ଚତୁର୍ଥ କାର୍ଯ୍ୟକ୍ଷମ ମିସନ (ଏମ୍୪)ରେ ଉତ୍କ୍ଷେପଣ ପାଇଁ ପ୍ରସ୍ତୁତ ହୋଇ ରହିଛି। ଏହା ଚନ୍ଦ୍ରଯାନ-୨ର ଏକ ଫଲୋଅପ୍ ମିସନ ଯାହା ଚନ୍ଦ୍ରପୃଷ୍ଠରେ ସୁରକ୍ଷିତ ଅବତରଣ କରି ଭ୍ରମଣ କରିବାର ସମସ୍ତ କ୍ଷମତା ପ୍ରଦର୍ଶନ କରିବ। ସୂଚନାଯୋଗ୍ୟ, ଏକ ସଫ୍ଟୱେର୍ ତ୍ରୁଟି କାରଣରୁ ସେପ୍ଟେମ୍ବର ୨୦୧୯ରେ ଚନ୍ଦ୍ରଯାନ-୨ କ୍ରାସ୍-ଲ୍ୟାଣ୍ଡିଂ କରିଥିଲା। ଇସ୍ରୋ କହିଛି ଯେ, ରୋଭର ସଫଳତାର ସହିତ ଚନ୍ଦ୍ରରେ ଅବତରଣ କରିବାକୁ ସୁନିଶ୍ଚିତ କରିବାକୁ ଏହା ପୂର୍ବ ବିଫଳତାରୁ ଶିକ୍ଷା କରି ଏକ ତ୍ରୁଟି-ରହିତ ଡିଜାଇନ ବାଛିଛି। ଇସ୍ରୋ ଚେୟାରମ୍ୟାନ୍ ଏସ୍ ସୋମନାଥ କହିଛନ୍ତି ଯେ, ଚନ୍ଦ୍ରଯାନ-୨ରେ ଏକ ସଫଳତା-ଭିତ୍ତିକ ଡିଜାଇନ୍ ବଦଳରେ ସ୍ପେସ୍ ଏଜେନ୍ସି ଚନ୍ଦ୍ରଯାନ-୩ରେ ଏକ ବିଫଳତା-ଭିତ୍ତିକ ଡିଜାଇନ ବାଛିଛି, ଯାହା ଏକ ସଫଳ ଅବତରଣକୁ ସୁନିଶ୍ଚିତ କରିବ।
ଚନ୍ଦ୍ରଯାନ-୨ର ବିକ୍ରମ ଲ୍ୟାଣ୍ଡରରେ କ’ଣ ତ୍ରୁଟି ଥିଲା ସେ ବିଷୟରେ ଇସ୍ରୋ ମୁଖ୍ୟ ସୂଚନା ଦେଇଛନ୍ତି। ସୋମନାଥ କହିଛନ୍ତି ଯେ, ଏଥର ଅବତରଣ କ୍ଷେତ୍ରକୁ ୫୦୦ ମିଟର x ୫୦୦ ମିଟରରୁ ଚାରି କିମି x ୨.୫ କିମି ପର୍ଯ୍ୟନ୍ତ ସମ୍ପ୍ରସାରିତ କରାଯାଇଛି। ତେଣୁ ଏହା ଯେକୌଣସି ସ୍ଥାନରେ ଅବତରଣ କରିପାରିବ, ଏହା ଏକ ନିର୍ଦ୍ଦିଷ୍ଟ ବିନ୍ଦୁକୁ ଟାର୍ଗେଟ କରିବ ନାହିଁ। ଯଦି ପ୍ରଦର୍ଶନ ଖରାପ ହୁଏ ତେବେ ଏହା ସେହି ଅଞ୍ଚଳର ଯେକୌଣସି ସ୍ଥାନରେ ଅବତରଣ କରିପାରିବ। ଚନ୍ଦ୍ରଯାନ-୩ରେ ମଧ୍ୟ ଅଧିକ ଇନ୍ଧନ ଅଛି। ତେଣୁ ଏହାର ଏକ ବିକଳ୍ପ ଅବତରଣ ସ୍ଥାନକୁ ଯିବା ପାଇଁ ଅଧିକ କ୍ଷମତା ଅଛି। ବିକ୍ରମ ଲ୍ୟାଣ୍ଡର ବର୍ତ୍ତମାନ ଅନ୍ୟ ପୃଷ୍ଠରେ ଅତିରିକ୍ତ ସୌର ପ୍ୟାନେଲ ରଖିଛି। ଏହା ଅଧିକ ଶକ୍ତି ଉତ୍ପାଦନ କରିବ। ଚନ୍ଦ୍ରଯାନ-୩ରେ ଅଛି ଏକ ସ୍ୱଦେଶୀ ପ୍ରପଲ୍ସନ ମଡ୍ୟୁଲ୍, ଲ୍ୟାଣ୍ଡର ମଡ୍ୟୁଲ୍ ଓ ଏକ ରୋଭର। ପ୍ରପଲ୍ସନ ମଡ୍ୟୁଲ୍ ଲ୍ୟାଣ୍ଡର ଓ ରୋଭରକୁ ଇଞ୍ଜେକ୍ସନ୍ ଅର୍ବିଟ୍ରୁ ୧୦୦ କିମି ଚନ୍ଦ୍ର କକ୍ଷପଥ ପର୍ଯ୍ୟନ୍ତ ବହନ କରିବ। ଏହାର ମଧ୍ୟ ଚନ୍ଦ୍ର କକ୍ଷପଥରୁ ପୃଥିବୀର ସ୍ପେକ୍ଟ୍ରାଲ୍ ଓ ପୋଲାରିମେଟ୍ରିକ୍ ପରିମାପ ଅଧ୍ୟୟନ ନିମନ୍ତେ ହାବିଟେବଲ୍ ପ୍ଲାନେଟାରୀ ଆର୍ଥ (ସେପ୍) ପେଲୋଡ୍ର ଏକ ସ୍ପେକ୍ଟ୍ରୋ-ପୋଲାରିମେଟ୍ରି ଅଛି।
