ନୂଆଦିଲ୍ଲୀ, ୩୦/୦୮: ଭାରତୀୟ ଅଲରାଉଣ୍ଡର ଷ୍ଟୁଆର୍ଟ ବିନ୍ନି କ୍ରିକେଟର ସମସ୍ତ ଫର୍ମାଟରୁ ଅବସର ଘୋଷଣା କରିଛନ୍ତି । ୩୭ ବର୍ଷୀୟ ବିନ୍ନି ସୋମବାର ଏନେଇ ଘୋଷଣା କରିଛନ୍ତି । ସେ ଦୀର୍ଘ ଦିନ ହେବ ଦଳରୁ ବାହାରେ ଥିଲେ । ୨୦୧୬ ପରେ ସେ କୌଣସି ଅନ୍ତର୍ଜାତୀୟ ମ୍ୟାଚ୍ ଖେଳିନଥିଲେ ।
୨୦୧୪ରେ ନ୍ୟୁଜିଲାଣ୍ଡ ବିପକ୍ଷ ଦିନିକିଆ ମ୍ୟାଚରେ ପଦାର୍ପଣ କରିଥିଲେ ବିନ୍ନି । ସେ ଭାରତ ପାଇଁ ୬ଟି ଟେଷ୍ଟ , ୧୪ଟି ଦିନିକିଆ ଓ ୩ଟି ଟି୨୦ ମ୍ୟାଚ୍ ଖେଳିଛନ୍ତି । ତାଙ୍କ ନାମରେ ଭାରତ ପକ୍ଷରୁ ସର୍ବଶ୍ରେଷ୍ଠ ବୋଲିଂର ରେକର୍ଡ ରହିଛି ।
୨୦୧୪ରେ ବିନ୍ନି ବାଂଲାଦେଶ ବିପକ୍ଷରେ ୪ ରନ୍ ଦେଇ ୬ଟି ଓ୍ୱିକେଟ୍ ନେଇଥିଲେ । ତାଙ୍କ ରେକର୍ଡ କେହି ଭାଙ୍ଗିପାରି ନାହାଁନ୍ତି । ସେ ଟେଷ୍ଟ କ୍ରିକେଟରେ ୧୯୪ ରନ୍ କରିବା ସହ ୩ଟି ଓ୍ୱିକେଟ୍ ନେଇଛନ୍ତି । ଦିନିକିଆ କ୍ରିକେଟରେ ସେ ୨୩୦ ରନ୍ କରିବା ସହ ୨୦ଟି ଓ୍ୱିକେଟ୍ ଓ ଟି୨୦ରେ ୩୫ ରନ୍ ଓ ଗୋଟିଏ ଓ୍ୱିକେଟ୍ ଅକ୍ତିଆର କରିଛନ୍ତି ।
ଏହାସହ ବିନ୍ନି ପ୍ରଥମ ଶ୍ରେଣୀ କ୍ରିକେଟରେ ୯୫ ମ୍ୟାଚ୍ ଖେଳି ୪୭୯୬ ରନ୍ କରିଛନ୍ତି । ଏହାସହ ୧୪୮ଟି ଓ୍ୱିକେଟ୍ ହାସଲ କରିଛନ୍ତି । ସେହିପରି ୧୦୦ଟି ଲିଷ୍ଟ୍ ଏ ମ୍ୟାଚରେ ସେ ୧୭୮୮ ରନ୍ କରିବା ସହ ୯୯ ଓ୍ୱିକେଟ୍ ନେଇଛନ୍ତି ।
