ନୂଆଦିଲ୍ଲୀ, ୨୨/୦୧: ଦିନିକିଆରେ ଅଧିନାୟକ ପଦ ଗଲା ପରେ ସାମ୍ବାଦିକ ସମ୍ମିଳନୀ କରିଥିଲେ ବିରାଟ କୋହଲି । ଟି୨୦ ଅଧିନାୟକ ପଦ ପ୍ରସଙ୍ଗରେ ତାଙ୍କ ସହ କୌଣସି ବିସିସିଆଇ ଅଧିକାରୀ କଥା ହୋଇନଥିବା ସେ କହିଥିଲେ । ଏପ୍ରସଙ୍ଗରେ ଉଭୟ ବିରାଟ ଓ ବିସିସିଆଇ ମୁହାଁମୁହିଁ ହୋଇଥିଲେ । ଗଣମାଧ୍ୟମରେ ବିରାଟ ମୁହଁ ଖୋଲିଥିବା କାରଣରୁ ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲି କାରଣ ଦର୍ଶଅ ନୋଟିସ ପଠାଇବାକୁ ଚାହୁଁଥିବା ଖବର ଆସିଥିଲା । କିନ୍ତୁ ଏହି ଖବରକୁ ଖଣ୍ଡନ କରିଛନ୍ତି ଗାଙ୍ଗୁଲି ।
ଗାଙ୍ଗୁଲି କହିଛନ୍ତି ଯେ, ଏହି ଖବରରେ ସତ୍ୟତା ନାହିଁ । ଦକ୍ଷିଣ ଆଫ୍ରିକା ଗସ୍ତ ପୂର୍ବରୁ ସେ କୋହଲିଙ୍କୁ କୌଣସି କାରଣ ଦର୍ଶାଅ ନୋଟିସ ପଠାଇବାକୁ ଚାହୁଁନଥିଲେ ବୋଲି ଦାଦା କହିଛନ୍ତି । ଏକ ଜାତୀୟ ଖବରକାଗଜକୁ ସାକ୍ଷାତକାର ଦେଇ ଗାଙ୍ଗୁଲି କହିଛନ୍ତି ଯେ, ସେ କେବେ ହେଲେ ଏକଥା ଭାବି ନାହାଁନ୍ତି । ଯେଉଁ ଖବର ସାମ୍ନାକୁ ଆସୁଛି ସେଥିରେ କିଛି ସତ୍ୟତା ନାହିଁ ।
ସୂଚନାଯୋଗ୍ୟ, ଗାଙ୍ଗୁଲି ବିରାଟଙ୍କ ଉପରେ ଖପ୍ପା ଥିବା ଓ ପଦକ୍ଷେପ ନେବାକୁ ଚାହୁଁଥିବା ଖବର ଆସିଥିଲା । କିନ୍ତୁ ବୋର୍ଡର ଅନ୍ୟ ସଦସ୍ୟ ମନାଇବା ପରେ ଗାଙ୍ଗୁଲି ଏପରି ପଦକ୍ଷେପ ନେଇନଥିଲେ । ଏହା ଦକ୍ଷିଣ ଆଫ୍ରିକା ଗସ୍ତ ପୂର୍ବରୁ ବିରାଟଙ୍କ ମନୋବଳ ଉପରେ ପ୍ରଭାବ ପକାଇଥାନ୍ତା ବୋଲି କିଛି ଗଣମାଧ୍ୟମରେ ପ୍ରକାଶିତ ହୋଇଥିଲା ।
ଏହାପୂର୍ବରୁ ବିରାଟ ସାମ୍ବାଦିକ ସମ୍ମିଳନୀ କରିଥିଲେ । ଯେଉଁଥିରେ ଗାଙ୍ଗୁଲି ଓ ତାଙ୍କର ବୟାନ ମଧ୍ୟରେ ଆକାଶ ପାତଳ ଫରକ ଥିଲା । ଗାଙ୍ଗୁଲି ମିଛ କହୁଥିବା ଚର୍ଚ୍ଚା ହୋଇଥିଲା । ନେଟିଜେନ୍ସ ମଧ୍ୟ ଏହାକୁ ନେଇ କମେଣ୍ଟ କରିଥିଲେ ।
