ନୂଆଦିଲ୍ଲୀ: ବଲିଉଡ ସିନେମାର ଲୋକପ୍ରିୟ ଅଭିନେତା ଅକ୍ଷୟ କୁମାରଙ୍କ ନୂଆ ଚଳଚ୍ଚିତ୍ର ‘ବଚ୍ଚନ ପାଣ୍ଡେ’କୁ ଟକ୍କର ଦେଉଛି ‘ଦ କାଶ୍ମୀର ଫାଇଲସ୍’। ସାରା ଦେଶରେ କାଶ୍ମୀର ଫାଇଲ୍ସ ଚଳଚିତ୍ରର ଲୋକପ୍ରିୟତା ଏତେ ରହିଛି ଯେ ଯାହା ଏବେ ଅକ୍ଷୟ କୁମାରଙ୍କ ମୁଣ୍ଡ ବିନ୍ଧାର କାରଣ ପାଲଟିଛି । ପ୍ରଥମ ଦିନରେ ବକ୍ସ ଅଫିସରେ ୧୩,୨୫ କୋଟି ଟଙ୍କା ଛୁଇଁ ପାରିଥିବା ଫିଲ୍ମ ‘ବଚ୍ଚନ ପାଣ୍ଡେ’ ଦ୍ବିତୀୟ ଦିନରେ କିନ୍ତୁ ଫେଲ୍ ମାରିଛି । ଚଳଚ୍ଚିତ୍ର ବିତରକମାନେ ଆଶା କରିଥିଲେ ଯେ ଶୁକ୍ରବାର ଅପେକ୍ଷା ଫିଲ୍ମଟି ଶନିବାର ଦିନ ଭଲ ବ୍ୟବସାୟ କରିବ, କିନ୍ତୁ ତାହା ହୋଇପାରିଲା ନାହିଁ । ବର୍ତ୍ତମାନ ପରିସ୍ଥିତିରେ ଯଦି ଫିଲ୍ମ ରବିବାର ଦିନ ଭଲ ବ୍ୟବସାୟ ନକରେ, ତାହାଲେ ପ୍ରଥମ ସପ୍ତାହ ଶେଷରେ ବକ୍ସ ଅଫିସରେ ଫିଲ୍ମ ଫ୍ଲପ୍ ହେବାର ସମ୍ଭାବନା ରହିଛି ।
ଯେଉଁ ଅଞ୍ଚଲରେ ଚଳଚ୍ଚିତ୍ର ‘ବଚ୍ଚନ ପାଣ୍ଡେ’ ସର୍ବାଧିକ ରୋଜଗାର କରିବ ବୋଲି ଆଶା କରାଯାଉଥିଲା, ସେଠାରେ ଏହା ଅଧିକ କ୍ଷତି ସହିଛି। ଦିଲ୍ଲୀ, ଉତ୍ତରପ୍ରଦେଶ, ଉତ୍ତରପ୍ରଦେଶ, ପଞ୍ଜାବ, ହରିୟାଣା, ହିମାଚଳ ପ୍ରଦେଶ, ଦିଲ୍ଲୀ ଏବଂ ଚଣ୍ଡିଗଡ଼ ଟେରିଟୋରିରେ ଦ୍ୱିତୀୟ ଦିନରେ ଏହି ଚଳଚ୍ଚିତ୍ରର ସଂଗ୍ରହ ପ୍ରଭାବିତ ହେଉଥିବା ଜଣାପଡିଛି |
ମହାରାଷ୍ଟ୍ର ଏବଂ ଗୁଜୁରାଟରେ ଫିଲ୍ମଟି ପ୍ରଥମ ଦିନରେ ଭଲ ବ୍ୟବସାୟ କରିଥିଲା, କିନ୍ତୁ ଦ୍ୱିତୀୟ ଦିନରେ ଏହା କମି ଯାଇଛି । ପ୍ରାରମ୍ଭିକ ଆକଳନ ଅନୁଯାୟୀ, ଶୁକ୍ରବାର ତୁଳନାରେ ଫିଲ୍ମର ଶନିବାର ସଂଗ୍ରହରେ ପ୍ରାୟ ୧୦ରୁ ୧୫ ପ୍ରତିଶତ ହ୍ରାସ ଘଟିଛି। ଅନ୍ୟପକ୍ଷରେ, ଅଷ୍ଟମ ଦିନ ଅପେକ୍ଷା ନବମ ଦିନରେ କାଶ୍ମୀର ଫାଇଲ ୨୦ କୋଟିରୁ ଅଧିକ ସଂଗ୍ରହ କରିଛି।
