ସାଲେପୁର ୨୪।୧୦: କରୋନା ଲଢେଇରେ ଆଖିବୁଜିଲେ ଡାକ୍ତର । ଦୀର୍ଘ ୧୫ଦିନ ହେବ କରୋନା ସହ ଲଢେଇ କରି ଶେଷରେ ଆଖିବୁଜିଛନ୍ତି ଆଉ ଜଣେ ଯୋଦ୍ଧା । ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟର ସ୍ତ୍ରୀ ଓ ପ୍ରସୂତି ରୋଗ ବିଭାଗର ମୁଖ୍ୟ ଡାକ୍ତର ରୁକ୍ମଣୀ ଦେବୀଙ୍କର ୬୨ ବର୍ଷ ବୟସରେ ପରଲୋକ ହୋଇଯାଇଛି ।
ଖବର ଅନୁଯାୟୀ, ଡାକ୍ତର ରୁକ୍ମଣୀ ଦେବୀ କରୋନାରେ ଆକ୍ରାନ୍ତ ହୋଇ ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିଲେ । କିନ୍ତୁ ସେଠାରେ ସେ ଆଖିବୁଜିଦେଇଛନ୍ତି । ସେ ଜଣେ କରୋନା ଯୋଦ୍ଧା ହୋଇଥିବାରୁ କୋଭିଡ୍ କଟକଣା ଅନୁଯାୟୀ ତାଙ୍କର ଶେଷକୃତ୍ୟ ସଂପନ୍ନ ହୋଇଯାଇଛି । ତାଙ୍କର ଦୁଇ ଜଣ ଝିଅ ଥିବା ବେଳେ ବଡ଼ ଜ୍ୱାଇଁ ଚିନ୍ମୟ ବଲ୍ଲଭ ବେହେରା ମୁଖାଗ୍ନୀ ଦେଇଥିଲେ ।
ତାଙ୍କ ଜନ୍ମସ୍ଥାନ ବାରିଗୋଳ ପଞ୍ଚାୟତ ବୋଦାମୁଣ୍ଡାଇ ଗ୍ରାମରେ ହୋଇଥିବା ବେଳେ ସେ ସାଲେପୁର କଲେଜ ରୋଡର ରୋଧପୁର ଗ୍ରାମରେ ରହି ରୋଗୀ ସେବା କରୁଥିଲେ ।ତାଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ତାଙ୍କ ବାସଭବନ ସାଲେପୁର କଲେଜରୋଡ୍, ବୋଦାମୁଣ୍ଡାଇ ଗ୍ରାମ ସମେତ ଆଖପାଖ ଅଞ୍ଚଳରେ ଶୋକର ଛାୟା ଖେଳିଯାଇଛି ।
