ହିମାଚଳ ପ୍ରଦେଶର ମଣ୍ଡି ଆସନରେ ହେବାକୁ ଥିବା ଉପ-ନିର୍ବାଚନରେ ବଲିଉଡ ଅଭିନେତ୍ରୀ କଙ୍ଗନା ରାଣାୱତ ନିର୍ବାଚନ ଲଢ଼ି ପାରନ୍ତି। ସେ ବିଜେପି ପ୍ରାର୍ଥୀ ହୋଇପାରନ୍ତି ବୋଲି ଚର୍ଚ୍ଚା ହେଉଛି। ଗତ ମାର୍ଚ୍ଚରେ ବିଜେପି ସାଂସଦ ରାମସ୍ୱରୂପ ଶର୍ମାଙ୍କ ଦେହାନ୍ତ ପରେ ଏହି ଆସନ ଖାଲି ରହିଛି।
ମଣ୍ଡି ଲୋକସଭା ବ୍ୟତୀତ ହିମାଚଳ ପ୍ରଦେଶ ବିଜେପି ନିର୍ବାଚନ କମିଟି ଅକ୍ଟୋବର ୩୦ରେ ରାଜ୍ୟର ତିନୋଟି ବିଧାନସଭା ଆସନରେ ଅନୁଷ୍ଠିତ ହେବାକୁ ଥିବା ଉପ-ନିର୍ବାଚନ ପାଇଁ ପ୍ରାର୍ଥୀ ଚୂଡ଼ାନ୍ତ କରିବାକୁ ଯାଉଛି।
ଅପରପକ୍ଷରେ କଙ୍ଗନା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଖୋଲାଖୋଲି ଭାବେ ଇଚ୍ଛା ପ୍ରକାଶ କରିନାହାନ୍ତି। କିନ୍ତୁ ବିଜେପି କଙ୍ଗନାକୁ ଟିକେଟ୍ ଦେବା ସପକ୍ଷରେ ଥିବା ଜଣାପଡ଼ିଛି। ସୂଚନାଯୋଗ୍ୟ, କଙ୍ଗନା ମଣ୍ଡି ଜିଲ୍ଲାର ଭମ୍ବଲା ଗାଁ ଏବଂ ନିକଟରେ ମନାଲିରେ ନିଜର ନୂତନ ଘର ନିର୍ମାଣ କରିଛନ୍ତି। ଏହା ମଧ୍ୟ ମଣ୍ଡି ସଂସଦୀୟ ନିର୍ବାଚନମଣ୍ଡଳୀ ଅଧୀନରେ ରହିଛି।
