କାନପୁର ୨୬।୧୧: ହରିଦ୍ୱାର ଓ କାଶୀ ଭଳି ଏବେ କାନପୁରରେ ମଧ୍ୟ ଗଙ୍ଗା ଆରତୀ ହେବ। ଏଥିଲାଗି ଏବେ ରୂପରେଖ ପ୍ରସ୍ତୁତ ହେଉଛି। ନଭେମ୍ବର ୨୭ ତାରିଖ ଶୁକ୍ରବାର ଦିନ ପରୀକ୍ଷାମୂଳକ ଭାବେ ଗଙ୍ଗା ଆରତୀ କରାଯିବ। ଅଟଳ ଘାଟରେ ପ୍ରଥମ ପରୀକ୍ଷାମୂଳକ ଗଙ୍ଗା ଆରତୀ ହେବାକୁ ଥିବା ବେଳେ କୋଭିଡ-୧୯ ନୀତି ନିୟମ ପୂର୍ବକ କାର୍ଯ୍ୟକ୍ରମ ଅନୁଷ୍ଠିତ ହେବ।
ଗଙ୍ଗାଆରତୀ ଲାଗି ଏବେ କାନପୁରରେ ଲୋକେ ବେଶ ଉତ୍ସାହିତ। ହରିଦ୍ୱାର ଓ କାଶୀ ଭଳି ଏଠାରେ ନିୟମିତ ଗଙ୍ଗା ଆରତୀ ହେବ। ଏଣୁ ଆରତୀ ଲାଗି ଘାଟକୁ ସଜା ଯାଉଛି। ଶୁକ୍ରବାର କାନପୁରରେ ହେବାକୁ ଯାଉଥିବା ପ୍ରଥମ ଗଙ୍ଗା ଆରତୀ ନେଇ ପଣ୍ଡିତ ଶିବକାନ୍ତ ଶାସ୍ତ୍ରୀ ବେଶ୍ ଆଗ୍ରହୀ ଥିବା କହିଛନ୍ତି। କାନପୁରରେ ମଧ୍ୟ କାଶୀ ଭଳି ସବୁଦିନ ଗଙ୍ଗା ଆରତୀ ହେଉ ସେଥି ଲାଗି ଘାଟକୁ ପ୍ରସ୍ତୁତ କରାଯାଉଛି।
ଶୁକ୍ରବାର ପରୀକ୍ଷାମୂଳକ ଗଙ୍ଗା ଆରତୀ ଲାଗି ପ୍ରଶାସନ ସହାୟତା କରୁଛି। ଏହି ଅବସରରେ ଅଟଳ ଘାଟକୁ ୨୧ ହଜାର ଦୀପ ଆଲୋକରେ ଆଲୋକିତ କରାଯିବ। ପରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟ ନାଥଙ୍କ ଠାରୁ ସମୟ ନିଆଯାଇ ଏଠାରେ ସବୁଦିନିଆ ଗଙ୍ଗା ଆରତୀକୁ ଶୁଭାରମ୍ଭ କରାଯିବ ବୋଲି ଜଣାପଡିଛି।
