ବାଲିପାଟଣା ୧୬।୦୬ : ଏଟିଏମ୍ ଲୁଟ୍ ଉଦ୍ୟମ ପଣ୍ଡ । ରାଜଧାନୀ ଉପକଣ୍ଠ ବାଲିପାଟଣା ଥାନା ନରଦା ବଜାରରେ ଥିବା ଷ୍ଟେଟ୍ ବ୍ୟାଙ୍କ ଏଟିଏମ୍ରୁ ଲୁଟ୍ ଉଦ୍ୟମ ପଣ୍ଡ ହୋଇଛି । ବାଲିପାଟଣା ପୋଲିସ ଘଟଣାସ୍ଥଳରେ ଛାନ୍ଭିନ୍ ଜାରି ରଖିଛି ।
ଖବର ଅନୁଯାୟୀ, ମଙ୍ଗଳବାର ବିଳମ୍ବିତ ରାତି ଜଣେ ଲୁଟେରା ମୁହଁରେ ଗାମୁଛା ଗୁଡ଼ାଇ ଏଟିଏମ୍ ମଧ୍ୟରେ ପ୍ରବେଶ କରିବା ସହ ଏଟିଏମ୍ ମେସିନ୍କୁ ଭାଙ୍ଗିବାକୁ ପ୍ରୟାସ କରିଥିଲେ । ଘଟଣା ସମୟରେ ସମସ୍ତ ଦୃଶ୍ୟ ସିସିଟିଭିରେ କଏଦ ହୋଇଛି । ଏଟିଏମ୍ର ସମ୍ମୁଖ ଭାଗର ଏକ ଅଂଶ ମଧ୍ୟ ଭାଙ୍ଗିଯାଇଥିଲା । ଏହି ସମୟରେ ସେନ୍ସର ଯୋଗୁଁ ବ୍ୟାଙ୍କ ମୁଖ୍ୟ ଅଫିସକୁ ଲୁଟ୍ ଉଦ୍ୟମ ହେଉଥିବା ନେଇ ସୂଚନା ମିଳିଥିଲା । ଏହାପରେ ବାଲିପାଟଣା ଥାନାକୁ ଖବର ଦିଆଯାଇଥିଲା । ବାଲିପାଟଣା ଥାନା ପୋଲିସ ତୁରନ୍ତ ନରଦା ବଜାରରେ ପହଞ୍ଚିଥିଲେ । ସେତେବେଳକୁ ଲୁଟେରା ଜଣକ ଫେରାର ହୋଇଯାଇଥିଲା । ଏଟିଏମ୍ର କେବଳ ସାମ୍ନା ଅଂଶଟି ଭାଙ୍ଗିଯାଇଥିଲା । ଆଇରନ୍ ଚେଷ୍ଟର କୌଣସି କ୍ଷତି ହୋଇନଥିଲା । ଏପିରିକି ଏଟିଏମ୍ରେ ଥିବା ସମସ୍ତ ଟଙ୍କା ସୁରକ୍ଷିତ ରହିଛି । ସେପଟେ ଏନେଇ ବାଲିପାଟଣା ଥାନାରେ ଏକ ମାମଲା ରୁଜୁ ହୋଇଛି ।
