ଡେରାଡୁନ୍: ଉତ୍ତରକାଶୀର ସିଲ୍କ୍ୟାରା-ବାରକୋଟ ସୁଡ଼ଙ୍ଗ ନିର୍ମାଣ କାର୍ଯ୍ୟ ପୁଣିଥରେ ଆରମ୍ଭ ହୋଇଛି। ଜାତୀୟ ରାଜପଥ ଭିତ୍ତିଭୂମି ଉନ୍ନୟନ ନିଗମ ଲିଃ (ଏନ୍ଏଚ୍ଡିସିଏଲ୍)ର ଜଣେ ପଦସ୍ଥ ଅଧିକାରୀ ଏନେଇ ସୂଚନା ଦେଇ କହିଛନ୍ତି, ୪.୫ କିଲୋମିଟର ଦୀର୍ଘ ଏହି ସୁଡ଼ଙ୍ଗ ସିଲ୍କ୍ୟାରା ପଟରୁ ଭୁଶୁଡ଼ି ପଡ଼ିଥିଲା। ବର୍ତମାନ ଏହାର ବିପରୀତ ବାରକୋଟ ପଟରୁ କାମ ଆରମ୍ଭ ହୋଇଛି। ତେବେ ଆବଶ୍ୟକ ସୁରକ୍ଷା ବ୍ୟବସ୍ଥା ନିଶ୍ଚିତ କରିବା ପରେ ସିଲ୍କ୍ୟାରା ପଟରୁ କାମ ଆରମ୍ଭ ହେବ। ହିମାଳୟ ଅଞ୍ଚଳରେ କାର୍ଯ୍ୟକରିଥିବା ଭୂତତ୍ତ୍ବବିତ୍ ନବୀନ ଯୁୟାଲ୍ କହିଛନ୍ତି ଯେ ସିଲ୍କ୍ୟାରା ପଟରୁ ଭୁଶୁଡ଼ି ଥିବା ସୁଡ଼ଙ୍ଗର ଭଗ୍ନାଂଶ, ପଥର, ମାଟି ଆଦି ବାହାର କରିବା ବଡ଼ ସମସ୍ୟା ହୋଇପାରେ। ଆବଶ୍ୟକ ବିକଳ୍ପ ବ୍ୟବସ୍ଥା ନଥାଇ ସୁଡ଼ଙ୍ଗ ଖୋଳିଲେ ପୁଣିଥରେ ଭୁଶୁଡ଼ିବା ସମ୍ଭବନା ରହିଛି।
ସୂଚନାଯୋଗ୍ୟ ଚାରିଧାମ ପ୍ରକଳ୍ପ ଅନ୍ତର୍ଗତ ଏହି ସୁଡ଼ଙ୍ଗର ନିର୍ମାଣ ବେଳେ ଏକ ଅଂଶ ନଭେମ୍ବର ୧୨ ତାରିଖରେ ତାରିଖରେ ଭୁଶୁଡ଼ି ପଡ଼ିଥିଲା। ଅନେକ ଘାତପ୍ରତିଘାତ ଦେି ଶେଷରେ ନଭେମ୍ବର ୨୮ ତାରିଖରେ ଏହା ଭିତରେ ଫସିରହିଥିବା ୪୧ ଶ୍ରମିକଙ୍କୁ ସୁରକ୍ଷିତ ଉଦ୍ଧାର କରାଯାଇଥିଲା। ଏହି ଦୁର୍ଘଟଣାର ଯାଞ୍ଚ ପାଇଁ ଉତ୍ତରାଖଣ୍ଡ ସରକାରଙ୍କ ଦ୍ବାରା ଗଠିତ ୬ଜଣିଆ କମିଟି ବର୍ତମାନ ସୁଦ୍ଧା ରିପୋର୍ଟ ଦାଖଲ କରିନାହାନ୍ତି। ଏନେଇ ରାଜ୍ୟ ବିପର୍ଯ୍ୟୟ ପରିଚାଳନା କର୍ତୃପକ୍ଷ ଶାନ୍ତନୁ ସରକାର କହିଛନ୍ତି ଯେ ଯାଞ୍ଚ ଶେଷ ହୋଇଛି।
