ନୂଆଦିଲ୍ଲୀ ୧୯/୦୬: କୋଚ୍ ରାହୁଲ ଦ୍ରାବିଡଙ୍କ ଅଧିନରେ ଭାରତ ଏବେ ଭିନ୍ନ ଭିନ୍ନ ସିରିଜ୍ ଖେଳୁଛି । ଏହାସହ ଦଳର ଲକ୍ଷ୍ୟ ଟି୨୦ ବିଶ୍ୱକପ୍ ଉପରେ ରହିଛି । ଦକ୍ଷିଣ ଆଫ୍ରିକା ବିପକ୍ଷ ସିରିଜ୍ ପରେ ଭାରତ ଇଂଲଣ୍ଡ ଗସ୍ତ କରିବ ଓ ସେଠାରେ ହିଁ ବିଶ୍ୱକପର ପ୍ରକୃତ ମିଶନ ଆରମ୍ଭ ହୋଇଯିବ । ଏବେ ବିସିସିଆଇ ମୁଖ୍ୟ ସୌରଭ ଗାଙ୍ଗୁଲି ମଧ୍ୟ ଟିମ୍ ଇଣ୍ଡିଆର ବିଶ୍ୱକପ ମିଶନ ଉପରେ ନିଜର ମତ ଦେଇଛନ୍ତି । କିପରି ଭାବେ ଦ୍ରାବିଡ ଦଳକୁ ପ୍ରସ୍ତୁତ କରୁଛନ୍ତି ସେନେଇ ମଧ୍ୟ ଗାଙ୍ଗୁଲି କହିଛନ୍ତି ।
ଗାଙ୍ଗୁଲି କହିଛନ୍ତି ଯେ, ଦ୍ରାବିଡ ଖେଳାଳିଙ୍କ ରୋଟେସନ୍ ଉପରେ ଧ୍ୟାନ ରଖିଛନ୍ତି । ଅନେକ ଖେଳାଳିଙ୍କୁ ଗୋଟିଏ ଷ୍ଟେଜରେ ଏକାଠି ଖେଳାଯିବା ନେଇ ବିଚାର ଚାଲିଛି । ଇଂଲଣ୍ଡ ଗସ୍ତରେ ଅନେକ ଖେଳାଳିଙ୍କୁ ମ୍ୟାଚରେ ଦେଖିବାକୁ ମିଳିବ । ଏହି ସବୁ ଖେଳାଳିଙ୍କୁ ଅକ୍ଟୋବରରେ ହେବାକୁ ଥିବା ଟି୨୦ ବିଶ୍ୱକପ୍ ପାଇଁ ସୁଯୋଗ ଦିଆଯାଇପାରେ ।
ସୂଚନାଯୋଗ୍ୟ, ଏବେ ଭାରତ ଦକ୍ଷିଣ ଆଫ୍ରିକା ବିପକ୍ଷରେ ଟି୨୦ ସିରିଜ୍ ଖେଳୁଛି । ଯେଉଁଥିରେ ଋଷଭ ପନ୍ତ ଭାରତୀୟ ଦଳର ନେତୃତ୍ୱ ନେଉଛନ୍ତି । ରୋହିତ ଶର୍ମା, ବିରାଟ କୋହଲି, ଜସପ୍ରିତ ବୁମରାହ, ମହମ୍ମଦ ସାମିଙ୍କ ଭଳି ଖେଳାଳି ସିରିଜ ଖେଳୁନାହାଁନ୍ତି । କେଏଲ ରାହୁଲ ପୂର୍ବରୁ ସିରିଜରେ ଥିଲେ ବି ଆହତଜନିତ ସମସ୍ୟା ପାଇଁ ବାଦ୍ ପଡିଛନ୍ତି ।
ଏହି ସିରିଜ୍ ପରେ ଭାରତର ନଜର ଇଂଲଣ୍ଡ ଉପରେ ରହିବ । ଏଠାରେ ଜୁଲାଇ ୧ରୁ ଟେଷ୍ଟ୍ ମ୍ୟାଚ୍ ଆରମ୍ଭ ହେବ । ଏହାପରେ ତିନିଟିକିଆ ଟି୨୦ ଓ ଦିନିକିଆ ସିରିଜ୍ ଖେଳାଯିବ । ତେବେ ୨୦୨୧ ଟି୨୦ ବିଶ୍ୱକପରେ ଭାରତ ନୈରାଶ୍ୟଜନକ ପ୍ରଦର୍ଶନ କରିଥିଲା । ଏବେ ରୋହିତଙ୍କ ନେତୃତ୍ୱ ଓ ଦ୍ରାବିଡଙ୍କ କୋଚିଂରେ ଭାରତ ଇତିହାସ ରଚିବା ଲକ୍ଷ୍ୟରେ ରହିଛି ।
