ମେଲବୋର୍ଣ୍ଣ ୨୭।୧୨: ସିଡନୀରେ କୋଭିଡ୍-୧୯ର ନୂତନ ମାମଲା କାରଣରୁ ଭାରତ ଓ ଅଷ୍ଟ୍ରେଲିଆ ମଧ୍ୟରେ ସିଡନୀ କ୍ରିକେଟ୍ ଗ୍ରାଉଣ୍ଡରେ ତୃତୀୟ ଟେଷ୍ଟ ମ୍ୟାଚ୍ର ଆୟୋଜନ ସମ୍ଭାବନା କମ ରହିଛି। ଏହା ଉପରେ ଆଗାମୀ ଦୁଇ ଦିନରେ ନିଷ୍ପତ୍ତି ନିଆଯିବ। ମେଲବୋର୍ଣ୍ଣ କ୍ରିକେଟ୍ ଗ୍ରାଉଣ୍ଡ(ଏମସିଜି)ର ମୁଖ୍ୟ କାର୍ଯ୍ୟକାରୀ ଅଧିକାରୀ ଷ୍ଟୁଆର୍ଟ ଫକ୍ସ ରବିବାର କହିଛନ୍ତି ଆମେ ଚାହୁଁଛୁ ସିଡନୀରେ ମ୍ୟାଚ୍ ହେଉ, ହେଲେ ସ୍ଥିତି ବହୁତ ଜଟିଳ ହୋଇ ପଡିଛି।
ଫକ୍ସ ‘ସିଡନୀ ମର୍ଣ୍ଣିଂ ହେରାଲ୍ଡ’କୁ କହିଛନ୍ତି, ସେ ନ୍ୟୁସାଉଥ ଓ୍ଵେଲ୍ସର ସ୍ଵାସ୍ଥ୍ୟ ବିଭାଗ ସହିତ ମିଶି କାମ କରୁଛନ୍ତି। ହେଲେ ସ୍ଥିତି ଏବେ ଜଟିଳ ହେବାରେ ଲାଗିଛି। ମ୍ୟାଚ୍ ଆୟୋଜନ ପାଇଁ ସିଡନୀକୁ ପର୍ଯ୍ୟାପ୍ତ ସମୟ ଦିଆଯାଇଛି। କାରଣ ଯେତିକି ଅଧିକ ସମୟ ମିଳିବ ସିଡନୀରେ ମ୍ୟାଚ୍ ଆୟୋଜନ ସମ୍ଭାବନା ବଢିବ। ଆଗାମୀ ଦୁଇ ଦିନରେ ଏହା ଉପରେ ନିଷ୍ପତ୍ତି ନିଆଯିବ ବୋଲି ଫକ୍ସ କହିଛନ୍ତି।
ଆଗାମୀ ଦୁଇ ଦିନରେ ମ୍ୟାଚ୍ ଆୟୋଜନ ନେଇ ସ୍ଥିତି ସ୍ପଷ୍ଟ ହୋଇଯିବ ବୋଲି ସେ କହିଛନ୍ତି। ସିଡନୀର ଉତ୍ତର ସମୁଦ୍ର କୂଳିଆ ଅଞ୍ଚଳରେ କୋଭିଡ୍-୧୯ ମାମଲା ଚିହ୍ନଟ ହେବା ପରେ ତୃତୀୟ ଟେଷ୍ଟ ସିଡନୀରେ ଖେଳାଯିବା ନେଇ ଅନିଶ୍ଚିତତା ଜାରି ରହିଛି। ତୃତୀୟ ଟେଷ୍ଟ ଜାନୁଆରୀ ୭ରେ ଖେଳାଯିବ।
