ମୁମ୍ବାଇ : ଅସୁସ୍ଥ ସ୍ତ୍ରୀଙ୍କୁ ଭେଟିବା ପାଇଁ ଆଣ୍ଟିଲିଆ ବୋମା ଆତଙ୍କ ଓ ମନସୁଖ ହିରନ ହତ୍ୟା ମାମଲାରେ ଗିରଫ ହୋଇଥିବା ମୁମ୍ବାଇର ପୂର୍ବତନ ପୁଲିସ ଅଧିକାରୀ ତଥା ଏନ୍କାଉଣ୍ଟର ସ୍ପେସାଲିଷ୍ଟ ପ୍ରଦୀପ ଶର୍ମାଙ୍କୁ ସୁପ୍ରିମ୍କୋର୍ଟ ସୋମବାର ତିନି ସପ୍ତାହ ପାଇଁ ଅନ୍ତରୀଣ ଜାମିନ ପ୍ରଦାନ କରିଛନ୍ତି। ଆବେଦନରେ ଶର୍ମା ଦର୍ଶାଇଥିଲେ ଯେ, ତାଙ୍କ ସ୍ତ୍ରୀଙ୍କ ଦେହ ଅତ୍ୟନ୍ତ ଖରାପ ଏବଂ ତାଙ୍କର ତୁରନ୍ତ ସର୍ଜରିର ଆବଶ୍ୟକତା ରହିଛି।
ଶିଳ୍ପପତି ମୁକେଶ ଅମ୍ବାନିଙ୍କ ଦକ୍ଷିଣ ମୁମ୍ବାଇ ବାସଭବନ ‘ଆଣ୍ଟିଲିଆ’ ବାହାରେ ଏକ ବିସ୍ଫୋରକ-ଭର୍ତ୍ତି ଏସ୍ୟୁଭି ରଖିବା ଏବଂ ଥାନେର କାର୍ ଯନ୍ତ୍ରାଂଶ ଦୋକାନ ମାଲିକ ମନସୁଖ ହିରନଙ୍କୁ ହତ୍ୟା କରିବା ଅଭିଯୋଗରେ ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) ଅବସରପ୍ରାପ୍ତ ବରିଷ୍ଠ ପୁଲିସ ଇନ୍ସପେକ୍ଟର ଶର୍ମାଙ୍କୁ ଗିରଫ କରିଥିଲା। ଆତଙ୍କ ଓ ହତ୍ୟା ମାମଲାରେ ବିଭିନ୍ନ ପ୍ରମାଣକୁ ଆଧାର କରି ଜୁନ୍ ୨୦୨୧ରେ ତାଙ୍କୁ ଗିରଫ କରାଯାଇଥିଲା। ଅପରପକ୍ଷେ ଶର୍ମା ନିଜକୁ ନିର୍ଦ୍ଦୋଷ ଓ ସେ ପୁଲିସ ପ୍ରତିହିଂସାର ଶିକାର ହୋଇଥିବା ଅଭିଯୋଗ କରିଆସୁଛନ୍ତି। ତାଙ୍କର ଏକାଧିକ ଜାମିନ ଆବେଦନକୁ ବମ୍ବେ ହାଇକୋର୍ଟ ପୂର୍ବରୁ ଖାରଜ କରିଦେଇଥିଲେ।
