ନୂଆଦିଲ୍ଲୀ,୧୨/୦୨: ଫେବ୍ରୁଆରୀ ୧୮ରୁ ଚେନ୍ନାଇରେ ଆଇପିଏଲ ପାଇଁ ଖେଳାଳିଙ୍କ ନିଲାମି ଆରମ୍ଭ ହେବ । ଏଥିପାଇଁ ଭାରତୀୟ ବରିଷ୍ଠ ଖେଳାଳି ହରଭଜନ ସିଂ ଓ ମଧ୍ୟକ୍ରମ ବ୍ୟାଟସମ୍ୟାନ୍ କେଦାର ଯାଦବଙ୍କ ସହ ଅଷ୍ଟ୍ରେଲିଆ ବ୍ୟାଟସମ୍ୟାନ୍ ଷ୍ଟିଭ୍ ସ୍ମିଥ୍ ଓ ଗ୍ଲେନ୍ ମ୍ୟାକ୍ସଓ୍ୱେଲଙ୍କୁ ୨ କୋଟି ଆଧାର ମୂଲ୍ୟ ବା ବେସ୍ ପ୍ରାଇସ୍ ବର୍ଗରେ ରଖାଯାଇଛି ।
ଆଇପିଏଲ ମ୍ୟାନେଜମେଣ୍ଟ ଚଳିତବର୍ଷ ଖେଳାଳିଙ୍କ ସଂଖ୍ୟାରେ ହ୍ରାସ କରିଛି । ଚଳିତ ବର୍ଷ ୨୯୨ ଜଣ ଖେଳାଳି ନିଲାମ ପାଇଁ ସାମିଲ ହେବେ । ୮ଜଣ ଫ୍ରାଞ୍ଚାଇଜି ୬୧ଟି ସ୍ଥାନ ପାଇଁ ନିଲାମ ଡାକିବେ । ଏହି ତାଲିକାରେ ୧୬୪ ଭାରତୀୟ ଓ ୧୨୫ ବିଦେଶୀ ଖେଳାଳି ରହିଛନ୍ତି ।
ଆରସିବି ପାଇଁ ସର୍ବାଧିକ ୧୩ଟି ସ୍ଥାନ ଖାଲି ରହିଛି । ସେହିପରି ହାଇଦ୍ରାବାଦ ମାତ୍ର ୩ ଖେଳାଳିଙ୍କୁ କିଣି ପାରିବ । ପଞ୍ଜାବ ଟିମ୍ ସର୍ବାଧିକ ୫୩ କୋଟି ୧୦ ଲକ୍ଷ ଟଙ୍କା ଧରି ନିଲାମ ପ୍ରକ୍ରିୟାରେ ସାମିଲ ହେବ । ହାଇଦ୍ରାବାଦ ୧୧ କୋଟି ଧରି ପ୍ରକ୍ରିୟାରେ ଭାଗ ନେବ । ଚେନ୍ନାଇ ସୁପର କିଙ୍ଗସ୍ ୨୨ କୋଟି ୭୦ ଲକ୍ଷ ଟଙ୍କା ସହ ନିଲାମକୁ ଓହ୍ଲାଇବ । ଚେନ୍ନାଇ ପାଖରେ ୭ଟି ସ୍ଥାନ ଖାଲି ରହିଛି । ଚେନ୍ନାଇ ଚଳିତ ବର୍ଷ ହରଭଜନ ସିଂ ଓ କେଦାର ଯାଦବଙ୍କୁ ରିଲିଜ କରିଛି ।
ମହାନ ବ୍ୟାଟସମ୍ୟାନ୍ ସଚିନ ତେନ୍ଦୁଲକରଙ୍କ ପୁତ୍ର ଅର୍ଜୁନ ତେନ୍ଦୁଲକର ତାଲିକାରେ ୨୦ ଲକ୍ଷ ଟଙ୍କାର ବେସ୍ ପ୍ରାଇସ୍ ବର୍ଗରେ ରହିଛନ୍ତି । ମ୍ୟାକ୍ସଓ୍ୱେଲ୍ ଓ ସ୍ମିଥଙ୍କ ବ୍ୟତୀତ ବିଦେଶୀ ଖେଳାଳିସାକିବ ଅଲ ହସନ, ମୋଇଲ ଅଲ୍ଲୀ, ସେନ୍ ଓ୍ୱିଲଙ୍ଗସ୍, ଲିୟାମ ପ୍ଲଙ୍କେଟ୍, ଜୈସନ ରୟ ଓ ମାର୍କ ବୁଡ ମଧ୍ୟ ୨ ଲକ୍ଷ ବେସ୍ ପ୍ରାଇସ୍ ବର୍ଗରେ ସାମିଲ ହୋଇଛନ୍ତି ।
ଦେଢ କୋଟିର ଆଧାର ମୂଲ୍ୟ ବର୍ଗରେ ୧୨ ଖେଳାଳିଙ୍କୁ ସ୍ଥାନ ମିଳିଛି । ଭାରତୀୟ ବୋଲର ହନୁମା ବିହାରୀ ଓ ଦ୍ରୁତ ବୋଲର ଉମେଶ ଯାଦବ ଏକ କୋଟି ବର୍ଗରେ ରହିଛନ୍ତି । ଏହି ନିଲାମ ପ୍ରକ୍ରିୟା ଭାରତୀୟ ସମୟାନୁସାରେ ଦିନ ୩ଟାକୁ ଆରମ୍ଭ ହେବ ।
