ନୂଆଦିଲ୍ଲୀ, ୧୬/୦୬: ଅଷ୍ଟ୍ରେଲିଆ ଷ୍ଟାର୍ ବ୍ୟାଟସମ୍ୟାନ୍ ଗ୍ଲେନ୍ ମ୍ୟାକ୍ସଓ୍ୱେଲଙ୍କ ଦମଦାର ପାଳିରେ ଶ୍ରୀଲଙ୍କାକୁ ପ୍ରଥମ ଦିନିକିଆରେ ମାତ୍ ଦେଇଛି । ଦ୍ୱିତୀୟ ଦିନିକିଆ ଗୁରୁବାର ଖେଳାଯିବ । ଏହାପୂର୍ବରୁ ଅଷ୍ଟ୍ରେଲିଆ ଟିମକୁ ବଡ ଝଟକା ଲାଗିଛି । ଦଳର ଷ୍ଟାର୍ ଖେଳାଳି ମାର୍କସ୍ ଷ୍ଟୋଇନସ ଆହତଜନିତ କାରଣରୁ ଦଳରୁ ବାଦ୍ ପଡିଛନ୍ତି ।
ଏହାସହ ସ୍ପିନର୍ ଆଷ୍ଟନ୍ ଏଗର ମଧ୍ୟ ଦ୍ୱିତୀୟ ଦିନିକିଆ ଖେଳିବେ ନାହିଁ । ସେ ପ୍ରଥମ ଦିନିକିଆରେ ୩୧ ବଲରୁ ୪୪ ରନ୍ କରିଥିଲେ । ଉଭୟଙ୍କ ସ୍ଥାନରେ ଟ୍ରାଭିଡ୍ ହେଡ୍ ଓ ମାଥ୍ୟୁ କୁହନେମେନଙ୍କୁ ସାମିଲ କରାଯାଇଛି ।
କଙ୍ଗାରୁ ଟିମ୍ ପୂର୍ବରୁ ମଧ୍ୟ ଆହତ ସମସ୍ୟା ଦେଇ ଗତି କରୁଛି । ଦିନିକିଆ ସିରିଜରେ ମିଚେଲ ମାର୍ଶ, ମିଚେଲ ଷ୍ଟାର୍କ, କେନ୍ ରିଚାର୍ଡସନ୍ ଓ ସିନ୍ ଆବାର୍ଟଙ୍କ ଭଳି ଖେଳାଳି ଆହତଜନିତ କାରଣରୁ ଖେଳୁନାହାଁନ୍ତି ।
ମାଥ୍ୟୁଙ୍କୁ ମିଳିପାରେ ଦିନିକିଆରେ ପଦାର୍ପଣ ସୁଯୋଗ
୨୫ ବର୍ଷୀୟ ମାଥ୍ୟୁ କୁହନେମେନ ବାମହାତୀ ସ୍ପିନର୍ ଅଟନ୍ତି । ସେ ଅଷ୍ଟ୍ରେଲିଆ ତରଫରୁ ୧୦ଟି ପ୍ରଥମ ଶ୍ରେଣୀ କ୍ରିକେଟ୍ ଖେଳିଛନ୍ତି । ଏହାସହ ୨୯ ଓ୍ୱିକେଟ୍ ନେଇଛନ୍ତି । ତାଙ୍କୁ ଦିନିକିଆରେ ସୁଯୋଗ ମିଳିପାରେ ।
ଅଷ୍ଟ୍ରେଲିଆ ଟିମ୍
ଡେଭିଡ୍ ଓ୍ୱାର୍ଣ୍ଣର, ଆରୋନ ଫିଞ୍ଚ, ଷ୍ଟିଭ୍ ସ୍ପିଥ୍, ମାର୍ନସ୍ ଲାବୁସେନ, ଟ୍ରାବିସ୍ ହେଡ, ଆଲେକ୍ସ କେରୀ, ଗ୍ଲେନ୍ ମ୍ୟାକ୍ସଓ୍ୱେଲ, ପ୍ୟାଟ୍ କମିନ୍ସ, ଝାୟ ରିଚାର୍ଡସନ୍, ମାଇକେଲ୍ ସ୍ୱେପସନ୍, ଜୋସ୍ ହେଜଲଉଡ୍, ଜୋସ୍ ଇଂଲିଶ. କ୍ୟାମରନ୍ ଗ୍ରୀନ୍ ଓ ମାଥ୍ୟୁ କୁହନେମେନ୍
