ନୂଆଦିଲ୍ଲୀ ୦୨/୦୬: ମଝି ସମୁଦ୍ରରେ ଗାଏବ ହୋଇଗଲେ ଜାହାଜ କର୍ମଚାରୀ । ଚୀନରୁ ଗହମ ନେଇ ଆସୁଥିବା ଜାହାଜ ଲକ୍ ଫର୍ଚ୍ୟୁନର ଜଣେ କର୍ମଚାରୀ ସମୁଦ୍ରରେ ହଜି ଯାଇଛନ୍ତି । ଗୁଜୁରାଟର ମୁନ୍ଦ୍ରା ସ୍ଥିତ ଅଡାନୀ ପୋର୍ଟ ପହଁଚିବା ପରେ ଜାହାଜର ଜଣେ କର୍ମଚାରୀ ନଖୋଜ ଥିବା ଜଣା ପଡିଥିଲା । ଏନେଇ ଜଜାହାଜର କ୍ୟାପ୍ଟେନ ପୋଲିସରେ ସୂଚନା ଦେଇଛନ୍ତି । ତେବେ ନିଖୋଜ କର୍ମଚାରୀ ଜଣଙ୍କ ଉତ୍ତର ଚୀନର ଜୁ ଝାଙ୍ଗ୍ ବୋଲି ଜଣାପଡିଛି ।
ସୂଚନା ଅନୁସାରେ, ପାନାମା ରେଜିଷ୍ଟର୍ଡ ଲକ୍ ଫର୍ଚ୍ୟୁନ ନାମକ ଏକ ଜାହାଜ ଚୀନରୁ ମାଙ୍ଗାଲୋର ଆସିଥିଲା । ସେଠାରୁ ଜାହାଜଟି ମୁନ୍ଦ୍ରା ସ୍ଥିତ ଅଡାନୀ ପୋର୍ଟ ଯାଇଥିଲା । ଯାହା ମାଙ୍ଗାଲୋରରୁ ପ୍ରାୟ ୬୦ ନୌଟିକାଲ ମାଇଲ୍ ଦୂର । ତେବେ ଏଥିରେ ଥିବା ଜଣେ କର୍ମଚାରୀଙ୍କ କୌଣସି ପତ୍ତା ମିଳିନଥିଲା । ମୋଟ ୨୩ ଜଣ କର୍ମଚାରୀଙ୍କ ମଧ୍ୟରୁ ୨୨ ଜଣ ହିଁ ଉପସ୍ଥିତ ଥିଲେ ।
ଜାହାଜରେ ଥିବା ସମସ୍ତ କର୍ମଚାରୀ ଚୀନର ବୋଲି ଜଣାପଡିଛି । ତେବେ ନିଖୋଜ ଖବର ପରେ ପୋଲିସ ତଦନ୍ତ ଆରମ୍ଭ କରିଛି । ମୁମ୍ବାଇ ମେରାଇନ ପୋଲିସ ଏହି ମାମଲା ହାତକୁ ନେଇଛି ।
ଘଟଣାକୁ ନେଇ ପଶ୍ଚିମ କଚ୍ଛର ପୋଲିସ ଅଧିକ୍ଷକ ସୌରଭ ସିଂ କହିଛନ୍ତି ଯେ, ଗହମ ଲୋଡ୍ କରି ମୁନ୍ଦ୍ରା ଅଭିମୁଖେ ଏକ ଜାହାଜ ଆସିଥିଲା । ତେବେ ଏଥିରେ ଜଣେ କର୍ମଚାରୀ ନଥିବା ସୂଚନା ମିଳିଥିଲା । ଘଟଣାର ତଦନ୍ତ ଆରମ୍ଭ ହୋଇଛି । ଜାହାଜରେ କୌଣସି ସନ୍ଦିଗ୍ଧ ଦ୍ରବ୍ୟ ମିଳିନଥିବା ସେ କହିଛନ୍ତି ।
